ភ្នំពេញ : ដើម្បីធានារក្សាសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពក្នុងសង្គម ក្រសួងមហាផ្ទៃបានដាក់ចេញគោលការណ៍ និងវិធានការជាបន្តបន្ទាប់ក្នុងការបង្ការ ទប់ស្កាត់ និងបង្ក្រាបសកម្មភាពនាំមនុស្សឆ្លងកាត់ព្រំដែនដោយខុសច្បាប់ និងការគ្រប់គ្រងជនបរទេសស្របតាមច្បាប់នៃកម្ពុជា និងដើម្បីរឹតត្បិតការធ្វើដំណើរចេញ-ចូលក្នុងប្រទេស ពិសេសភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល និងផ្នែកខ្លះនៃភូមិសាស្ត្រតាមខេត្តមួយចំនួនត្រូវបានបិទខ្ទប់ជាបណ្តោះអាសន្ន ដើម្បីបង្ការទប់ស្កាត់ការឆ្លងរីករាលដាលនៃជំងឺនេះក្នុងសហគមន៍។

ក្រសួងមហាផ្ទៃបានបញ្ជាក់នៅថ្ងៃនេះថា ក្រសួងបានឃើញមានសកម្មភាពលួចលាក់ដឹកជញ្ជូនជនបរទេសចេញ-ចូលភូមិសាស្ត្របិទខ្ទប់ ក្នុងគោលបំណងនិងគោលដៅផ្សេងៗគ្នាដោយគេចចេញពីការធ្វើចត្តាឡីស័កតាមវិធានសុខាភិបាល ដែលអាចបង្កឱ្យមានហានិភ័យក្នុងការឆ្លងរីករាលដាលនៃជំងឺកូវីដ-១៩ ក្នុងសហគមន៍ និងប៉ះពាល់ដល់សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពក្នុងសង្គមថែមទៀត។

នៅថ្ងៃទី២៨ ខែមេសា ឆ្នាំ២០២១នេះ សម្តេចក្រឡាហោម ស ខេង បានចេញសេចក្តីណែនាំដោយបង្គាប់ឱ្យមានការស្រាវជ្រាវនិងបង្ក្រាបបណ្តាញមេក្លោង និងមេខ្យល់ក្នុងប្រទេស ដែលធ្វើសកម្មភាពនាំពលរដ្ឋកម្ពុជានិងជនបរទេសឆ្លងកាត់ព្រំដែនខុសច្បាប់ ហើយត្រូវទំនាក់ទំនងជាមួយអាជ្ញាធរនិងកម្លាំងមានសមត្ថកិច្ចប្រទេសជិតខាង ដើម្បីសហការបង្ក្រាបបណ្ដាញនិងកាត់ផ្ដាច់ខ្សែរយៈទំនាក់ទំនងប្រព្រឹត្តបទល្មើសនេះឱ្យខាងតែបាន។

ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក៏បានណែនាំដល់មន្ត្រីក្រោមឱវាទបន្តខិតខំសហការស្រាវជ្រាវលុបបំបាត់ឱ្យបានជាដាច់ខាតនូវការលួច ចេញ-ចូលតាមច្រកមិនផ្លូវការនៅតាមខ្សែបន្ទាត់ព្រំ។

ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានបញ្ជាឱ្យធ្វើការបណេ្តញចេញពីព្រះរាជាណាចក្រកម្ពុជាចំពោះជនបរទេសដែលជ្រៀតចូលមកក្នុងប្រទេសដោយខុសច្បាប់។

រដ្ឋមន្ត្រីក្រសួងមហាផ្ទៃបន្តទៀថា ក្នុងករណីរកឃើញជនបរទេស ដែលឆ្លងកាត់ព្រំដែនដោយខុសច្បាប់បានជ្រៀតចូលជ្រៅមកក្នុងប្រទេស ត្រូវធ្វើការឃាត់ខ្លួនហើយត្រូវសហការឱ្យអនុវត្តវិធានការចត្តាឡីស័កស្របតាមវិធានសុខាភិបាល និងត្រូវចាត់វិធានការឱ្យបានម៉ឺងម៉ាត់ស្របតាមច្បាប់។

សម្តេចក្រឡាហោម ស ខេង បានបញ្ជាក់ទៀតថា ក្នុងករណីរកឃើញក្រុមហ៊ុន រោងចក្រ សហគ្រាស ឬបុគ្គលណាដែលមានការពាក់ព័ន្ធក្នុងបទល្មើសនាំមនុស្សឆ្លងកាត់ព្រំដែនដោយខុសច្បាប់ ឬទទួលមនុស្សឆ្លងដែនខុសច្បាប់ ឱ្យធ្វើការត្រូវចាត់វិធានការច្បាប់ឱ្យបានម៉ឺងម៉ាត់បំផុត៕